ASAL MULA KARTU NATAL

Natal enggo ndeher. Enterem jelma si enggo nukur kartu Natal , enca ikirimna man orang tua, kade-kade, ate jadi, ras teman meriah.

Tapi etehndu kin asal mulana kartu Natal e? Turi-turinna ibenaken bas kegeluhen si Henry Cole nari, kalak Manggris (Inggris), si erdahin i Public Records Office (semacam kantor kearsipan) i London . Biasana adi enggo kenca ndeher wari Natal , ikirimina surat man kade-kade ras teman-temanna lako ngendesken 'Selamat Wari Natal'. Tapi paksa e, tahun 1840, erkiteken picetna dahin emaka lanai sempat ia erbahan surat .

Enca iukurina mbages-mbages, ioooh, morah nari kal nge ate kade-kade bagepe teman-temanku kerina adi sekali enda la reh suratku, ate Henry Cole. Ah, labo bage arih, kudahikenlah temanku si John Calcott Horsley, si beluh kal nggambar, ate si Henry enda. Emaka berkat me ia ndahi si Calcott . Ipindona gelah igambar Calcott sada kartu guna ikirimkenna man kade-kade ras temanna meriah.

Kartu si ibahan John Calcott Horsley e kira-kira 12,5 cm ku gedangna, 8 cm ku bertengna. Ibas kartu e ibahanna gambar sada jabu ibas jaman Victoria si sangana kundul engkeleweti meja janahna ngangkat gelas anggur nandangi i engger (toast). Enca arah kawes bagepe arah kemuhun lit gambar kalak musil. Ence iteruh gamabr e lit tulisen A Merry Christmas and a Happy New Year To You, selamat Wari Natal ras Tahun Baru man bandu. Isi tulisen bas kartu Natal seh asa gundari labo ndauh-ndauhsa bage denga.

Kartu Natal e jadi mbar beritana. Emaka bas tahun 1843 icetak me kira-kira 1000 lembar guna idayaken i tiga alu erga 1 shiling (em duit Inggris sikitikna, seri ras 1 sen bas kita). Tapi kalak Puritan, emekap golongen si ngutamaken kegeluhen si bersih (hidup kasalehan) emprotes gambar si lit bas kartu e. Nina, gambar e, kalak minem anggur, la payo erkiteken ngajuk kalak minem anggur si banci erabahan jelma tenggen. Tapi keberaten kalak Puritan e la ngasup nebeng kartu Natal e si terus icetak ras idayaken i tiga.

Lit ka kalak si ngatakensa maka kartu Natal si pemenana situhuna kal ibahan kalak Jerman kira-kira seratus tahun sope Henry Cole. Bage gia sekali, si jelas kartu Natal si pemena idayaken (jadi barang komersil) emekap sini ibahan si Henry ras temanna si John Calcott enda.

Bas tahun 1851 Henry Cole ngelakoken pameran si mbelin i London janah bas tahun 1852 ia ikut manteki Victoria and Albert Museum i London si termurmur seh asa gundari. Erkiteken belinna ngaruhna emaka Kerajan Inggris mereken gelar 'Sir' man Henry Cole. (dari berbagai sumber)


SELAMAT WARI NATAL 25 DESEMBER 2007, DAME I DONI, DAME BAS UKUR RAS DAME BAS GELUHTA.